പഠിച്ചിറങ്ങിയ ഉടൻ 4.5 ലക്ഷം വരെ ശമ്പളം, സ്വദേശത്തും വിദേശത്തും നിരവധി അവസരങ്ങൾ; അധികമാർക്കും അറിയാത്ത ഈ കോഴ്സ്
ഉന്നത വിദ്യാഭ്യാസ വകുപ്പിന് കീഴിലുള്ള അസാപ് കേരള ഹയര്‍ ആന്റ് ട്രെയിന്‍ മാതൃകയില്‍ ഉടന്‍ ആരംഭിക്കുന്ന എന്റോള്ഡ് ഏജന്റ് തൊഴില്‍ പരിശീലന കോഴ്‌സിലേക്ക് അപേക്ഷ ക്ഷണിച്ചു. കൊമേഴ്സ്, ബി.ബി.എ, എം.ബി.എ ബിരുദധാരികള്‍ക്കും, അവസാനവര്‍ഷ വിദ്യാര്‍ത്ഥികള്‍ക്കും അപേക്ഷിക്കാം. യു.എസ് ടാക്‌സേഷന്‍ രംഗത്ത് ഉയര്‍ന്ന ജോലിയും പ്രതിഫലവും ഉറപ്പ് നല്‍കുന്ന കോഴ്‌സാണിത്. നികുതി ശേഖരണത്തിനും നികുതി നിയമങ്ങള്‍ നടപ്പിലാക്കുന്നതിനും മേല്‍നോട്ടം വഹിക്കുന്ന യു.എസ് ഫെഡറല്‍ ഏജന്‍സിയായ ഐ.ആര്‍.എസിന് മുമ്പായി നികുതിദായകരെ പ്രതിനിധീകരിക്കാനുള്ള പദവിയുള്ള ഒരു പ്രൊഫഷണലാണ് എന്റോള്ഡ് ഏജന്റ് (ഇ.എ). നാലുമാസത്തോളമുള്ള പരിശീലന പദ്ധതിയിലൂടെ വിദ്യാര്‍ത്ഥികളെ അമേരിക്കന്‍ ഇന്റേണല് റവന്യൂ സര്‍വ്വീസ് നടത്തുന്ന സ്പെഷ്യല്‍ എന്റോള്മെന്റ് പരീക്ഷ എഴുതാന്‍ പ്രാപ്തരാക്കും. കോഴ്സ് വിജയകരമായി പൂര്‍ത്തീകരിച്ച് സര്‍ട്ടിഫിക്കറ്റ് നേടുന്ന വിദ്യാര്‍ത്ഥികള്‍ യു.എസ്സിലെ നികുതിദായകരെ പ്രതിനിധീകരിച്ച് നികുതി റിട്ടേണുകള്‍ ഫയല്‍ ചെയ്യാന്‍ അധികാരമുള്ളവരാകും. പ്രാഥമിക പരീക്ഷയിലൂടെയാവും കോഴ്‌സിലേക്കുള്ള പ്രവേശനം. തിരഞ്ഞെടുക്കപ്പെടുന്നവര്‍ക്ക് കോഴ്സിന്റെ തുടക്കത്തില്‍ തന്നെ ജോലിക്കായുള്ള കണ്ടീഷണല്‍ ഓഫര്‍ ലെറ്ററും നല്‍കും. തൊഴിലിലേക്ക് തിരഞ്ഞെടുത്ത ശേഷം, അതിനനുസൃതമായ പരിശീലനവും, തുടര്‍ന്ന് ജോലിയും നല്‍കുന്ന ‘ഹയര്‍ ആന്‍ഡ് ട്രെയിന്‍’ എന്ന മാതൃകയിലാണ് കോഴ്സുകള്‍ വിഭാവനം ചെയ്തിരിക്കുന്നത്. കാനറാ ബാങ്കിന്റെ സ്കില് ലോണ്‍ സൗകര്യം കോഴ്സ് ഫീസിന് ലഭ്യമാണ്.
യുഎസിൽ ജോലി എന്ന് കേട്ടാല്‍ ഐടി ആയിരിക്കും നമ്മുടെ മനസില്‍ ആദ്യം വരിക. എന്നാല്‍ ഐടി പോലെ ആകര്‍ഷകമായ, അധികമാരും കൈവച്ചിട്ടില്ലാത്ത മറ്റൊരു തൊഴില്‍ മേഖലയും ഇന്ത്യക്കാര്‍ക്ക് മുന്നിൽ യുഎസിലും പുറത്തും തുറന്നിരിപ്പുണ്ട്.
കൊമേഴ്സ് പശ്ചാത്തലമുള്ളവര്‍ക്ക് യുഎസ് നികുതി രംഗത്തും മറ്റ് രാജ്യങ്ങളില്‍ വലിയ തൊഴിലവസരങ്ങള്‍ തുറന്നു നല്‍കുന്ന എന്റോള്ഡ് ഏജന്റ് എന്ന യോഗ്യതയാണ് കേരളത്തിലും പുതിയ അവസരങ്ങള്‍ ലഭ്യമാക്കുന്നത്.
എന്താണ് എന്റോള്ഡ് ഏജന്റ്
സ്വദേശത്തിരുന്നും വിദേശത്തിരുന്നും യുഎസ് നികുതിദായകാര്‍ക്ക് വേണ്ടി നികുതി സംബന്ധമായ ജോലികള്‍ ചെയ്തു നല്‍കാന്‍ അവസരമൊരുക്കുന്ന യോഗ്യതയാണ് എന്റോള്ഡ് ഏജന്റ് (ഇഎ). യുഎസിലെ കേന്ദ്ര നികുതി ഏജന്‍സിയായ ഇന്റേണല് റവന്യൂ സര്‍വീസ് (ഐആര്‍എസ്) മുന്‍പാകെ നികുതിദായകരെ പ്രതിനിധീകരിക്കാനും ഇഎ യോഗ്യത വേണം. ഐആർഎസിന്‍റെ ഔദ്യോഗിക അംഗീകാരമുള്ള ഈ യോഗ്യതയുള്ളവര്‍ക്ക് യുഎസിൽ മാത്രമല്ല ഇന്ത്യയിലും ഇപ്പോള്‍ വലിയ അവസരങ്ങളാണുള്ളത്.
കേരളത്തില്‍ പരിചിതമില്ലാത്തതും എന്നാല്‍ ഏറെ സാദ്ധ്യതയുള്ളതുമായ ഈ യോഗ്യത നേടാന്‍ സഹായിക്കുന്ന കോഴ്സ് കേരളത്തിന് പരിചയപ്പെടുത്തിയിരിക്കുന്നത് ഉന്നത വിദ്യാഭ്യാസ വകുപ്പിന് കീഴിലുള്ള നൈപുണ്യ വികസന ഏജന്‍സിയായ അസാപ് കേരളയാണ്.
ഇഎ യോഗ്യത നേടാനുള്ള പരിശീലനമാണ് അസാപ് നല്‍കുന്നത്. ഈ യോഗ്യത നേടിയാല്‍ യുഎസിന് പുറമെ കാനഡ, യുകെ, ഓസ്ട്രേലിയ തുടങ്ങിയ രാജ്യങ്ങളിലും നികുതി രംഗത്ത് ജോലി കണ്ടെത്താന്‍ കഴിയും.
ഇന്ത്യയില്‍ ഇഎ യോഗ്യതയോടെ ജോലി ചെയ്യുന്നവര്‍ക്ക് തുടക്കത്തില്‍ തന്നെ 4.5 ലക്ഷം വരെ വാര്‍ഷിക ശമ്പളം ലഭിക്കുന്നുണ്ട്. ജോലി കണ്ടെത്തുന്നതിന് പുറമെ സ്വന്തമായി സംരംഭങ്ങള്‍ തുടങ്ങാനും ഇഎ യോഗ്യത അവസരമൊരുക്കുന്നു.
പഠനവും ജോലിയും ഒന്നിച്ച്
അസാപ് നടത്തുന്ന സ്ക്രീനിംഗ് ടെസ്റ്റ് മുഖേനയാണ് ഈ കോഴ്സിന് പ്രവേശനം നല്‍കുന്നത്. ഈ കോഴ്സില്‍ ചേരുമ്പോള്‍ തന്നെ ജോലി ഉറപ്പാക്കുന്ന മാതൃകയിലാണ് പരിശീലനം രൂപകല്‍പ്പന ചെയ്തിരിക്കുന്നത്.
തിരഞ്ഞെടുക്കപ്പെടുന്ന ഉദ്യോഗാര്‍ത്ഥികള്‍ക്ക് കോഴ്സിന്റെ ആരംഭത്തില്‍ തന്നെ ജോലിക്കുള്ള കണ്ടീഷനല്‍ ഓഫര്‍ ലെറ്ററും നല്‍കും. ജോലിക്ക് അനുസൃതമായ പരിശീലനവും തുടര്‍ന്ന് ജോലിയും നല്‍കുന്ന രീതിയാണിത്. വിജയകരമായി കോഴ്സ് പൂര്‍ത്തിയാക്കി എന്റോള്ഡ് ഏജന്റ് ആകുന്നവര്‍ക്ക് യുഎസിലെ നികുതിദായകരുടെ ടാക്സ് റിട്ടേണുകള്‍ ഫയല്‍ ചെയ്യാന്‍ സാധിക്കും.
ഈ യോഗ്യതയുള്ളവര്‍ക്ക് ഇന്ത്യയില്‍ തന്നെ ഇ വൈ, കെപിഎംജി, ഡിലോയ്റ്റ്, പിഡബ്ല്യുസി തുടങ്ങിയ ബഹുരാഷ്ട്ര കണ്‍സള്‍ട്ടന്‍സി കമ്പനികള്‍ ജോലി നല്‍കുന്നുണ്ട്. അസാപ് കേരളയുടെ ആദ്യ ബാച്ചിലെ 25 പേര്‍ക്ക് വിവിധ കമ്പനികളില്‍ ജോലി ലഭിച്ചു.
ജോലി സാദ്ധ്യതകള്‍
1. ഫുള്‍ ടൈം/ പാര്‍ട്ട് ടൈം
കമ്പനികളില്‍ മുഴുസമയ ജോലി ചെയ്യാം. ഈ മേഖലയില്‍ നിലവില്‍ കേരളത്തില്‍ 500 അവസരങ്ങളാണ് ഉള്ളത്. എന്റോള്ഡ് ഏജന്റ് കോഴ്സ് പഠിച്ചു കൊണ്ടിരിക്കുമ്പോള്‍ തന്നെ പാര്‍ട്ട് ടൈം ആയി ജോലി ചെയ്യാനും അവസരമുണ്ട്. നിലവില്‍ നിരവധി വിദ്യാര്‍ത്ഥികള്‍ ഇങ്ങനെ വിവിധ കമ്പനികള്‍ക്കു വേണ്ടി ജോലി ചെയ്യുന്നു.
2. സീസണല്‍ ഹയറിങ്
യു എസില്‍ നികുതി റിട്ടേണുകള്‍ ഫയല്‍ ചെയ്യേണ്ട സമയത്ത് കമ്പനികള്‍ അതിനുമാത്രമായി ആറു മാസക്കാലത്തേക്ക് നല്‍കുന്ന തൊഴിലവസരങ്ങള്‍. ഈ മേഖലയില്‍ 400 ഒഴിവുകളാണ് നിലവില്‍ ഉള്ളത്.
3. സംരംഭകത്വ സാദ്ധ്യത
എന്റോള്ഡ് ഏജന്റ് യോഗ്യതയുള്ളവര്‍ക്ക് യുഎസ് നികുതിദായകരുടെ ടാക്സ് റിട്ടേണുകള്‍ ഫയല്‍ ചെയ്യുന്നതിനും മറ്റു അനുബന്ധ സേവനങ്ങള്‍ നല്‍കുന്നതിനും സ്വന്തമായി സ്ഥാപനം ആരംഭിക്കാന്‍ കഴിയും. ഗുജറാത്തില്‍ ഇത്തരത്തില്‍ 2000 സ്ഥാപനങ്ങളെങ്കിലും ഉണ്ട്. ഈ മേഖലയില്‍ വന്‍ സാദ്ധ്യതയാണുള്ളത്.
പശ്ചിമ ബംഗാളിലും, ഗുജറാത്തിലും, ആന്ധ്രാ പ്രദേശിലും നിരവധി കമ്പനികള്‍ ഇഎ യോഗ്യതയുള്ളവരെ റിക്രൂട്ട് ചെയ്യുന്നുണ്ട്. കേരളത്തിലും ഈ മേഖലയില്‍ ലഭ്യമാകുന്ന മാനവവിഭവശേഷി ഉപയോഗിക്കുന്നതിനു വന്‍കിട കമ്പനികള്‍ ഓഫീസുകള്‍ തുറന്നിട്ടുണ്ട്. ഐ ടി മേഖല പോലെ സാമ്പത്തികമാന്ദ്യം ബാധിക്കാത്ത ഒരു തൊഴില്‍ മേഖലയാണിത് എന്നതും ആകര്‍ഷക ഘടകമാണ്.
അസാപ് നല്‍കുന്ന ആറു മാസ പരിശീലനം വിജയകരമായി പൂര്‍ത്തിയാക്കിയാല്‍ യുഎസ് ഫെഡറല്‍ റെവന്യൂ ഏജന്‍സിയായ ഐആര്‍എസ് നടത്തുന്ന സ്പെഷ്യല്‍ എന്റോള്മെന്റ് എക്സാമിനേഷന്‍ (എസ്ഇഇ) എഴുതാം. എസ്ഇഇ പാസായാല്‍ എന്റോള്ഡ് ഏജന്റ് യോഗ്യത ലഭിക്കും. പേരിനൊപ്പം ഇഎ എന്നു ചേര്‍ക്കാം. ഈ യോഗ്യതയുള്ളവര്‍ക്ക് യു എസിലെ സിപിഎ (സര്‍ട്ടിഫൈഡ് പ്രാക്ടീഷണര്‍ അക്കൗണ്ടന്‍റ്), സിഎഫ്എ (സര്‍ട്ടിഫൈഡ് ഫിനാന്‍സ് അനലിസ്റ്റ്) പരീക്ഷകളില്‍ ഒരു പേപ്പര്‍ ഇളവുണ്ട്. കൂടാതെ ക്രെഡിറ്റും കിട്ടും. ഇഎ ഒരിക്കലും സിഎക്കു തുല്യമല്ല.
യോഗ്യത
ബി.കോം, എം.കോം, ബി.ബി.എ, എം.ബി.എ-ഫിനാന്‍സ് ബിരുദധാരികള്‍ക്കും, സി.എ പൂര്‍ത്തിയാക്കാത്തവര്‍ക്കും പഠിച്ചു കൊണ്ടിരിക്കുന്നവര്‍ക്കും, അവസാനവര്‍ഷ വിദ്യാര്‍ത്ഥികള്‍ക്കുമാണ് അസാപ് നടത്തുന്ന ഇഎ കോഴ്സില്‍ പ്രവേശനം നല്‍കുന്നത്. ആറ് മാസമാണ് കോഴ്സ് കാലാവധി.
പരിശീലനത്തിന് നൈപുണ്യ വായ്പയും
ഇ എ പരിശീലന കോഴ്സിന് കാനറാ ബാങ്കിന്‍റെയും കേരള ബാങ്കിന്‍റെയും സ്കില് ലോണ്‍ സൗകര്യവും ഏര്‍പ്പെടുത്തിയിട്ടുണ്ട്. കോഴ്സ് ഫീസ് 58,315 രൂപയാണ്. എന്നാല്‍, സ്പെഷ്യല്‍ എന്റോള്മെന്റ് എക്സാമിനേഷന്‍ (എസ്ഇഇ) പരീക്ഷക്ക് അപേക്ഷിക്കുന്നതിന് 645 ഡോളര്‍ ഫീസ് അധികം നല്‍കേണ്ടതുണ്ട്. ഈ ഫീസും സ്കില് ലോണില്‍ ഉള്‍പ്പെടുത്തിയിട്ടുണ്ട്.
കൂടുതല്‍ വിവരങ്ങള്‍ക്ക് കളമശ്ശേരി അസാപ് കമ്മ്യൂണിറ്റി സ്കില് പാര്‍ക്കുമായി ബന്ധപ്പെടണം. ഫോണ്‍ : 6238093350.
